السويسرول بالمربى من مطبخ الشيف مونى بالصور

السلام عليكم ورحمة الله وبركاته
النهرده عملت سويسرول بالمربى
وطلع مظبوط جدا وطعمه رائع ومش بيتقطع
قلت لازم انزله لحبايبى واقولهم الطريقة
نبدأ بسم الله الرحمن الرحيم
المقادير
4 بيضات احمر
3 اكياس فانيليا
ملعقة صغيرة خل
كوب سكر بودرة
6 ملاعق كبيرة مياه دافية
كوب دقيق
ملعقة كبيرة بيكنج بودر
الطريقة
هنفصل الصفار عن البياض
هنضرب البياض بالمضرب
بعدها بشوية نضيفله ذرة ملح وكيس فانيليا وربع كوب السكر بودرة
ونضربهم كتير حوالى ربع ساعة
ونسيبهم
نحط فى بولا تانيه الصفار
نضربه كويس ومعاه بقية الفانيليا والخل
بعد كده نضيفله الدقيق بالتدريج ومعاه بقية كوب السكر بودرة والبيكنج و6 معالق المياه الدافيه واوعى تبقى سخنه
نضربهم بالمضرب لغاية مايبقى لونه فاتح
بعد كده نحط عليه البياض بالتدريج
ونقلب بمعلقة خشب بالراحة جدا عشان الهوا ميطلعش من العجينة
نجهز صينية مستطيلة وندهنا زيت ونحط عليها ورق زبدة
ونصب فيها العجينة
وندخلها الفرن على درجة حرارة 125
انا حطيت تحتها صينية فيها مياه ودايما بعمل كده مع اى حاجة بتخلى الحاجة طريه ومتنشفش
اخدت حوالى نص ساعة
اوعى تفتحى عليها عشان متهبطش
هتطفى اول ماالوش بتاعها يحمر
نطلعها
ونكون محضرين فوطة نضيفة
نقلب عليها الصينية
ونشيل ورق الزبدة بالراحة
انا حشتها مربى فراولة
ولفتها بورق الزبدة
اهم حاجة وانتى بتلفيها تضغطى عليها
بعد مالفتها حطتها فى ورق الزبدة ودخلتها التلاجه حوالى ساعتين
طلعتها غطتها بالبودينج وسكر البودرة ودخلتها تانى التلاجه
بعد كده طلعتها وقطعتها
دلوقتى هسيبكم مع الصور بالخطوات